​កាលពី​ថ្ងៃ ទី ២៦ ខែកញ្ញា ផ្សារ​ទំនើប​មួយ​នៅក្នុង​ខេត្ត Guangxi ប្រទេស​ចិន បានរៀបចំ​ឆាក​បង្ហាញ​ម៉ូដ​ដែលមាន​ប្រវែង​ប្រមាណ ៥០​ម​។ នៅលើ​ឆាក​នោះបាន​រៀប​ឥដ្ឋ​ធ្វើ​ពី​មាស ២៤០ ដុំ ដោយ​ក្នុង​មួយ​ដុំ​មាន​ទម្ងន់ ១ គីឡូ​។ ទស្សនិកជន​ឆ្លងកាត់​ជាច្រើន​បាន​ចោមរោម​ថតរូប​និង​និយាយ​ពី​កម្មវិធី នេះ​ដោយសារតែ​ការចង់​ដឹង​ពី​កម្មវិធី​ដ៏​ប្លែក​នេះ​។​

​មិន​ត្រឹមតែ​ខោអាវ​ក្នុង​តែប៉ុណ្ណោះ​ទេ​ដែល​បាន​ធ្វើឡើង​ពី​មាស សូម្បីតែ​ឆាក​ដែលមាន​ប្រវែង ៥០ ម៉ែត្រ​នោះ​ក៏ត្រូវ​បាន​ច្នៃ​ឡើង​ដោយ​បញ្ចូល​មាស​ដែរ​។​

​កំឡុង​ពេលដែល​តារា​ម៉ូ​ដែល​កំពុងតែ​ដើរ​លើ​ឆាក មាន​សន្តិសុខ​ជាច្រើន​បាន​ឈរ​យាម​ដោយ​បារម្ភ​ពី​សុវត្ថិភាព​របស់​តារា ម៉ូ​ដែល​ក៏ដូចជា​ខោអាវ​ក្នុង​ស្រោបមាស​នេះ​ផងដែរ​។​
 
​តាម​គេហទំព័រ QQ បាន​ឲ្យ​ដឹងថា ខោអាវ​ក្នុង​ពិសេស​នេះ​ត្រូវបាន​ស្រោប​ដោយ​មាស​សុទ្ធ​ទម្ងន់ ១.២ គីឡូ និង​មានតម្លៃ ៣០ ម៉ឺន​យាន់ (​ប្រមាណ ៥ ម៉ឺន​ដុល្លារ​)​។ ជាមួយនឹង​ឈុត​ខោអាវ​ក្នុងនេះ របាំងមុខ​របស់​តារា​ម៉ូ​ដែល​ក៏ត្រូវ​បានធ្វើ​ឡើង​ពី​មាស​ដែរ​។​
 
​មុននឹង​មានកម្ម​វិធី​នេះ ប្រទេស​ចិន​ក៏​ធ្លាប់​បង្ហាញ​ពី​ការបង្ហាញ​ម៉ូដ​ខោអាវ​ក្នុង​ធ្វើ​ពី​មាស ជា​ច្រើនដង​មកហើយ​។ កាលពី​ខែ មិថុនា កន្លងទៅ​តារា​ម៉ូ​ដែលជា​ច្រើន​បានបង្ហាញ​ម៉ូដ​ខោអាវ​ក្នុង​ស្រោបមាស​មាន តម្លៃ​ឡើងដល់ ៤០ ម៉ឺន​យាន់​(​ប្រមាណ ៦ ម៉ឺន​ដុល្លារ​)​នៅក្នុង​ខេត្ត Zhengzhou៕

ប្រភព​៖ QQ , sabay
​